Een van die belangrikste opdragte van Jesus aan die kerk is dat gelowiges na mede-gelowiges wat in nood verkeer, sal omsien. Ons Diens van Barmhartigheid vervul hierdie rol in die gemeente, onder andere deur die voorsiening van kospakkies aan ‘n hele aantal huisgesinne. Insgelyks word klere, komberse en ander huishoudelike items voorsien soos en wanneer die behoefte ontstaan.

Die taakspan vir diensverhoudinge sien om na die vergoeding asook die effektiewe dienslewering van die leraar en ander werknemers in diens van die gemeente. Die diensgroep bestuur ook die verhouding tussen die gemeente as werkgewer en die leraar en ander amptenare as werknemers.

Verskeie van ons lidmate is betrokke by die gemeenskap van Struisbaai-Noord, veral deur middel van die Onse Hoop Gemeenskapsentrum. Hier is hulle betrokke by ‘n wye verskeidenheid aktiwiteite, soos ‘n handwerkgroep, klub vir bejaardes, voorsiening van etes aan behoeftige bejaardes, jeugaktiwiteite om negatiewe invloede teen te werk, voorsiening van beurse aan verdienstige leerlinge, en selfs vir ‘n tersiêre student, en die plaaslike polisiëringsforum.

Ons het ‘n lewendige groep musiekentoesiaste (of ‘cantores’, soos ons koorleidster na hulle verwys) wat pragtige koorsang lewer. Die koor tree gereeld op by ons Nagmaaldienste, ons Kerssangdiens, Paasfees, en ander geleenthede. Ons het ook al saam met die Hugo Lambrechts Jeugkamerorkes opgetree. Die koor is ‘n hegte groep wat deur sang en vriendskap saamgebind word.

Met die wye verskeidenheid aktiwiteite waarby die gemeente, intern sowel as ekstern, betrokke is, is dit belangrik dat gasvryheid nie agterweë bly nie. Dit is ook een van ons waardes, en as die kerk van Jesus wil ons een en almal welkom en tuis laat voel deur die gasvrye wyse waarop ons mense ontvang en by aktiwiteite laat betrokke raak.