Ons herkoms

Die gemeente het sy eerste treë in die vroeë vyftigerjare gegee, en byeenkomste is destyds in die opelug en later in die gebou van die huidige L’Agulhas Kafee gehou. Die gemeente was toe nog deel van die Bredasdorp-gemeente. In 1963 is die huidige gebou in L’Agulhas opgerig, en het die inwoners en vakansiegangers ‘n formele kerkgebou gekry. Die dienste is aanvanklik deur besoekende leraars hanteer, maar daar is gou besef dat ‘n voltydse leraar uit Bredasdorp aangestel sal moet word. Die gemeente in L’Agulhas het daarna van krag tot krag gegaan totdat daar in 1996 besluit is om van Bredasdorp af te stig. So kom die NG Kerk Suidpunt tot stand, ook met die oprig van nog ‘n kerkgebou in Struisbaai, sodat die gemeente tot vandag toe uit twee sentra bedien word.

Ons karakter

Ons gemeente is deel van die familie van die Nederduits-Gereformeerde Kerk in Suid-Afrika, met die gereformeerde belydenis as fondament van ons geloof, werk en samesyn. Ingevolge hiervan is daar vir ons slegs een kriterium: die gesaghebbende Woord van God. In alles wat ons doen, is dit belangrik dat ons onsself onderwerp aan die waarheid van die Woord.  Voorts bely ons die unieke boodskap van die Woord dat die verhouding tussen God en mens ‘n verhouding is wat slegs op grond van die inisiatief van God ontstaan en in stand gehou word.  Binne hierdie konteks verbind ons ons ook tot die uitleef van die vyf solas van die hervorming, naamlik:

Vir meer oor gereformeerde spiritualiteit, klik hier.

Ons visie

God is ons lig.

Laat Sy lig ons diensbaar maak aan die suidpunt van Afrika.

Verklaring van die visiewoorde:

Ons waardes

Die vier fokusareas van ons geloofsreis

Volgens Bybelkennis.co.za word die woord dissipel vertaal met leerling, vakleerling of volgeling. In die tyd van Jesus Christus het die dissipels Hom as rabbi (of leermeester) gevolg. Waar Hy gegaan het, het hulle gevolg. Hulle leer deur sy onderrig, maar ook deur te kyk wat Hy doen, en dan te doen wat Hy doen. Jesus Christus het sy dissipels geroep om Hom te volg, en doen dit ook vandag nog. Die eerste dissipels het nie geweet waarheen Jesus hulle gaan neem nie. Hulle het wel geweet wat dit beteken om te volg – hulle gaan oral waar Hy gaan en sien alles wat Hy doen. Hierdie beginsels lê ook aan die kern van wat ons met dissipelskap in ons gemeente wil bereik. Verskeie modelle om dissipelskap te bevorder word tans ondersoek.

Een van die kernopdragte van die kerk is om om te sien na die versorging van die gemeenskap van gelowiges. In ons gemeente het ons ‘n span versorgers wat saam met die Kerkraad werk om seker te maak lidmate word versorg op geestelike, emosionele en fisiese gebied. Die versorgerspan kry ook leiding t.o.v. spesifieke vaardighede om hulle taak effektief uit te voer. Versorgers word geografies ingedeel volgens wyke, elk saam ‘n ouderling en diaken. Hierdie spannetjie neem dan verantwoordelikheid vir lidmaatversorging in hulle onderskeie wyke. Jy is baie welkom om met jou versorger in verbinding te tree. Klik hier vir die die versorgingspan in jou wyk.